Paschim News

आज : २०७८ कार्तिक ५ गतेPreeti to UnicodeUnicode to PreetiRoman to UnicodeDate Converter
न्यूज क्लब संवाददाता प्रकाशित : २०७५/५/१२ गते

गिनिज बुक अफ् द वल्ड रेकर्डमा नाम लेखाउन सफल पहिलो नेपाली हुन्  जादुगर सुरज मैनाली । जादुगरहरुको जादु देखेर सानै उमेरदेखि जादुमा रुची  लिएका मैनालीले जादुलाई नै पेशा बनाएर नेपालमा मात्र नभई विदेशमा समेत जादु देखाई नेपालको नाम राख्न सफल भएका छन् । जादुकलालाई  नै आफ्नाे पेशा बनाएका मैनालीसँग न्युज क्लब अफ् नेपालका लागि मोहनप्रसाद मैनाली र रेणुका काफ्लेले गरेको कुराकानीको सम्पादित अंशः-

जादु के हो ?

जादु एक किसिमको ज्ञान हो जुन गुरुबाट चेलालाई मौखिक तर गोप्य तरिकाले दिइन्छ । यो एकप्रकारको विज्ञान पनि हो ।

जादुकलाले समाजमा कस्तो किसिमको प्रभाव पार्दछ ?

यो एकप्रकारको मनोरञ्जन हो । यसको नकारात्मक प्रभाव छैन । मान्छेको आँखा छलेर मनोरञ्जन दिइने भएकाले यो प्रत्यक्ष रुपमा दिइने मनोरञ्जन मात्र हो ।

सिक्न सुरुवात कसरि गर्नु भयो ?

नेपालमा जादु भित्रीएकै भारत बाट जस्तो लाग्छ । तर, मेरो गुरुचाहि रविन्द्र मास्के हो । मास्के गुरुबाट सिकेको हुँ । एउटा दुइटा सिक्छु भनेर सिक्न शुरु गरेको बानि परेर धेरै सिकेँ । यसपछि मेरो प्रोफेसन नै हुन पुग्यो ।

सूचना प्रविधिको विकासको चरम रुप छ । लाइभ जादु  देखाएर जिविकोर्पाजन हुन सम्भव छ ?

सडकमा जादु देखाएर त सम्भव छैन तर कुनै कार्यक्रमहरुमा जादु देखाउँदा आम्दानी पनि राम्रै हुन्छ । स्कुल,कलेजको कार्यक्रमहरु, विवाह आदि कार्यक्रमहरुमा तथा ठूला घरानाहरुले आप्mनो महत्वपूर्ण इभेन्टस्मा बोलाउछन् त्यसबाट पनि अर्थोपार्जनमा राम्रै सहयोग पुगेको छ ।

समाजमा जादुकला कुनकुन रुपमा देखाउन सकिन्छ ?

काठमाडौको ट्राफिक जामका बारेमा पनि जादुमार्फत अवार्नेस कार्यक्रमहरु गर्न सकिन्छ ।

गिनिज बुकमा नाम लेखाउन कसरी सफल हुनु भयो ?

इन्टरनेस्नल ब्रदरहुड एण्ड म्याजिसियन् भन्ने एउटा संस्था छ । यसले विश्वमा भएका जादुकलाका  ब्यक्तिहरुलाई एकजुट गराउने काम गर्छ । 

नेपालमा जादुका बारेमा कुनैपनि संस्था नभएकोले मैले भारतको सहायतामा गिनिज बुकमा नाम लेखाउन सफल भएको हो ।  भारतमा भएको यो संस्थाको कार्यक्रममा मैले आफ्नाे कला प्रस्तुत गर्ने मौका पाएको थिएँ । मेरो जादुकला उत्कृष्ट भएकाले  मेरो नाम गिनिज बुकमा लेखिन पुग्यो ।

नेपालमा जादु सम्वन्धी संस्था खोल्न किन सकिरहेको छैन ?

नेपालमा राम्रा जादुगरहर दशजना पनि हुन मुश्किल छ । कतै संगठित भएका छैनौ । एकआपसमा चिनजान पनि छैन । संगठित नै नभएकाले संगठन खोल्ने त कुरै भएन नि ।

विदेशमा हरेक वर्ष यो सम्मेलन हुन्छ ?

हो । भइरहेको छ । जादुको प्रतिनिधित्व गर्ने देशहरुलाई रिङ नं दिएको हुन्छ । यो प्राप्त गर्नका लागि नेपालमा अलि प्रोफेसनल जादुगर हुनु आवश्यक छ । संगठन हुनु जरुरी छ । यसो हुन सक्यो भने नेपालमा पनि रिङ लिन सकिन्छ ।

यो सम्मेलनमा कति देशले भाग लिएका थिए ?

आयोजक भारत थियो । यसमा आठ देशले भाग लिएका थिए । नेपालबाट म एकजना मात्रे थिएँ ।

नेपालमा जादुकला देखाएर जिबिको पार्जन गर्न सकिन्छ ?

विगत आठ वषैदेखि गरिरहेको छु । संगठन बनाएर गर्ने हो भने अझ सजिलो हुने थियो ।

जादुकलालाई शिक्षा प्रणालीमा राख्न पनि सकिन्छ कि ?

सकिन्छ । विदेशका कतिपय देशमा जादुको पढाई नै हुन्छ । नेपालमा यो यस्तो अवस्था आउन समय लाग्छ ।

तपाइँ व्यक्तिगत रुपमा जानुभएको थियो भारतमा ?

नेपालबाट त एक्लै हो । तर हामीले समुहगतमा जादु  देखाएका थियौं । नेपाला जादुको संस्था नभएकाले भारतको सहयोग लिनु परेको हो ।

नेपालमा संस्था खोल्न कस्तो किसिमको तयारी आवश्यक छ त ?

सर्वे गर्न आउँछन् । यसको छुट्टै प्रोसेस छ । कमसेकम १० देखि १५ जनाको टिम हुनु आवश्यक छ । वंगलादेशको एउटा टिमले मसँग भनेको थियो कि नेपालमा शाखा खोल्ने हो भने हामी उपशाखा दिन्छौ । तर पहल नेपालबाट हुनु आवश्यक छ । भारतबाट चाहिँ तपाइँ यहिँ नै बस्नुस हामी सबै किसिमको सहयोग उपलब्ध गराउँछौ भनेका छन् ।

जादु देखाउने भौतिक वस्तु कहाँबाट प्राप्त हुन्छ ?

भौतिक वस्तु नेपालमा पाउन असम्भव नै छ । जस्तो जादुको लागि बनाएको एकबुक तास मात्र किन्नु पर्दा भन्सार तिरेर लिनु पर्छ । नेपालमा यस्ता सामानहरु बनाउन सकिदैन ।

जादुको बारेमा के भन्न चाहनु हुन्छ ?

नेपालमा जादुलाई झुक्याउने पेसाको रुपमा लिने गरिन्छ  वास्तवमा यो विज्ञान नै हो ।

न्युज क्ल्ब अफ् नेपाल मार्फत आफ्ना पाठक, दर्शक र शुभचिन्तकलार्इ केहि भन्नु छ कि ?

म यहि भन्छु कि जादु हेर्ने गर्नाले  मानसिक र शारिरिक स्वास्थ्यमा सकारात्मक प्रभाव पार्छ । समयसमयमा जादुकलाको अवलोकन गर्ने गरौं । र, जादुकलालाई नेपालमा स्थापित गर्ने जून मेरो लक्ष्य छ यसलाई सफल पार्न सहयोग गर्नुस् । मेरो लक्ष सफल भयो भने विश्वले नेपाललाई जादुको देश भनेर पनि चिन्ने छ ।

प्रतिकृया दिनुहोस्